Facebook para sa mabuti

          Noong isang linggo ay ­nagkita-kita kami ng ilang mga ­kaibi­gan at dito napag-usapan naming ang kasalukuyang nangyayari sa ating bansa. Ang sabi nu’ng ­kaibigan kong nagtatrabaho ngayon sa isang call center, maganda naman daw ang ginagawa ni ­Presidente Rody Duterte sa kanyang ­paglaban sa ilegal na droga pero sana ay gawin niya ito sa tamang ­paraan at hindi lamang basta-bastang pumapatay ng tao.

       Ang sabi naman nung isa ay tumigil na raw siya sa pagbabasa sa Facebook dahil nagsasawa na siyang magbasa ng mga kasinungalingan na pinapakalat doon. Dagdag pa niya na sa halip na makatulong sa pagbubuo ng maa­yos na relasyon ang Facebook ay nakakasira pa raw ngayon ito dahil minsan ay doon pa nag-aaway ang mga magkakaibigan dahil sa kanilang magkakaibang opinyon. Dumarami na raw kasi ang mga guma­gawa ng pekeng account at nagiging mga bayarang troll para lamang siraan ang mga kalaban sa pulitika kaya hindi na raw natin alam kung sino ba talaga ang nagsasabi ng totoo.

          Isa nang halimbawa rito ang pinakalat na #NagaLeaks ng ilan sa mga kaaway ni Bise Presidente Leni Robredo. Ayon sa ­#NagaLeaks, ang yumaong Jesse Robredo raw ay naging protektor ng mga ilegal na gawain sa Naga noong nabubuhay pa ito. Alam naman nating lahat na walang katotohanan ito at wala ­namang nailabas na matibay na ebidensya ang grupong nag-­akusa kay Robredo.

 

          Kumbaga, nagtago ang mga ito sa pangalang We Are Collective at hindi man lamang sila nagkaroon ng ­tapang na ­ipakilala ang kanilang sarili sa taumbayan. Kung talagang totoo ang kanilang pinapakalat na paninira laban kay Robredo eh ‘di bakit kailangan pa nila magtago? Halatang-halata na gumagawa lamang sila ng kuwento para siraan si VP Robredo dahil wala na ­silang maibato laban sa kanya. Si Presidente Duterte nga mismo ang nagsabi na basura lamang daw ang ­#NagaLeaks na ‘yan kaya hindi na raw niya ito pag-aaksayahan ng panahon.

        Sana sa halip na gamitin natin ang Facebook para manira at magkalat ng tsismis laban sa ating ­kapwa ay gamitin na lamang natin ito para sa ­mabuti. ­Halimbawa na rito ang nangyari doon sa isang bata sa Cebu na nakunang nag-aaral sa labas ng isang kilalang kainan at noong na-post ang kanyang ­litrato sa Facebook ay dumami ang mga taong tumulong sa kanya para makapagtapos ng pag-aaral.

Puwedeng-­puwede naman palang gamitin ang Facebook o ­social media para sa mabuti kaya sana ay mag-isip tayo bago tayo mag-post o mag-share. Isipin natin kung ang ilalagay ba natin sa ating Facebook ay makaka­tulong ba sa ating bansa o makakasira lamang ito.

Para sa inyong mga komento, mag-text sa 0916-6772989.

Source: http://www.abante.com.ph/kaya-natin-facebook-para-sa-mabuti.htm