DUTERTE SA IMPEACH ROBREDO: “I WILL RESIGN!”

Muling naghamon si Pangulong Rodrigo Duterte na magbibitiw siya sa puwesto kung mapapatunayang may kinalaman siya sa planong pagsasampa ng impeachment complaint kay Vice President Leni Robredo.

“Tanungin mo maski sino sa gobyerno, LTO, LTFRB, tangunin mo…kung may tinawagan ba ako ni isa.

Kung mayroon kang masabi, dalhin mo dito sabi ko mag-resign ako. I always do it with honor,” sagot ng pangulo sa tanong ng media kung may kinalaman ba ito sa pahayag ni House Speaker Pantaleon Alvarez na pinag-aaralan na nila ang pagsasampa ng impeachment sa pangalawang pangulo.

Bago umalis papuntang Myanmar kanina ang pangulo, nilinaw nito na wala siyang nalalaman at wala rin siyang ibinibigay na utos sa sinuman para pag-aralan ang pagsasampa ng impeachment kay Robredo dahil sa lantarang pagbatikos nito sa gobyerno.

“I never did anything, I will not do anything about it. ‘Pag sinabi kong wala, wala talaga. At ‘pag sinabi kong gawin ko yan, umatras ka na kasi gagawin ko talaga,” giit ni Duterte sa isang press conference sa Davao City International Airport.

Nilinaw din ni Duterte na wala siyang nakakausap na kongresista o senador para isulong ang pag-impeach kay Robredo.

Sagot ito ni Duterte sa banta ng pinuno ng Kamara na pag-aaralan ang posibilidad na magsampa ng impeachment complaint laban kay Robredo dahil sa ‘betrayal of public trust’.

Sinuportahan ito ni Solicitor General Jose Calida na nagsabing “treasonous” ang video message na ipinadala ni Robredo sa United Nations kung saan ibinunyag ang ‘palit-ulo scheme’ na ginagawa sa war on drugs ng gobyerno.

Source: https://www.abante.com.ph/duterte-sa-impeach-robredo-will-resign.htm