Nagsusumbong ang tao kay VP!

Inilatag kahapon ng kampo ni Vice President Leni Robredo ang katotohanan sa likod ng video message nito sa United NationsUnited Nations (UN).

Una, ang testimonyang ikinuwento ni Robredo na “palit-ulo” na diumano’y estilo ng anti-drug operations ng pulisya sa ilalim ng ‘war on drugs’ ng Duterte administration ay galing mismo sa mahihirap na taong tumatakbo at nagsusumbong sa kanilang opisina para maghanap ng makakapitan.

Ikalawa, ang ganitong mga problema at sumbong ng maliliit na biktima mismo ng kampanya kontra droga, partikular ng unang bugso ng Oplan Tokhang, ay ipinarating umano nila sa Philippine National Police (PNP) at Department of the Interior and Local Government (DILG) noong buwan pa ng Enero ngunit hanggang ngayon ay wala pa umano silang nakukuhang tugon mula sa nasabing mga sangay ng pamahalaan.

Ikatlo, hindi ito ang kauna-unahang pagkakataon na naiulat ang iba’t ibang pamamaraan ng operasyon ng ‘war on drugs’ dahil laman na rin ito ng iba’t ibang investigative report ng mga international bodies gaya ng Amnesty International, ng Human Rights Watch (HRW) at mga foreign news articles. Kaya hindi umano makatwirang sabihing paninira sa pamahalaan ang ginawa ni Robredo.

Ikaapat, kalagitnaan ng Pebrero nang matanggap nila ang request ng UN para sa isang video message ng Bise Presidente na agad naman nilang ginawa ang video at ipinadala rin agad sa UN. Nangyari umano ito bago pa nagkita sina Pangulong Rodrigo Duterte at VP Robredo sa Philippine Military Academy (PMA) graduation rites sa Baguio City.

Ayon kay Georgina Hernandez na tagapagsalita ng Pangalawang Pa­ngulo, naimbitahan umano si Robredo sa annual meeting ng UN Commission on Narcotic sa Vienna, Austria subalit hindi ito makakadalo kaya hiningan na lamang ng mensahe patungkol sa drug war sa Pilipinas.

Source: https://www.abante.com.ph/nagsusumbong-ang-tao-kay-vp.htm